235g döðlur
1 tsk matarsódi
120g mjúkt smjör
5 msk sykur
2 stk egg
3 dl hveiti
½ tsk salt
½ tsk vanilludropar
1 1/3 msk lyftiduft
Þeytið smjör og sykur vel saman og bætið eggjunum í, einu í senn. Þeytið vel og blandið síðan hveitinu, saltinu og vanilludropunum saman við. Bætið lyftiduftinu út í. Setjið döðlurnar í pott og látið vatn fljóta yfir. Látið suðuna koma upp, slökkvið á hitanum og látið döðlumaukið standa í pottinum í 3 mínútur. Bætið matarsódanum útí. Hellið ¼ bolla af döðlusoðinu út í og hrærið varlega. Blandið öllu döðlusoðinu útí að lokum. Smyrjið u.þ.b. 8 cm hátt lausbotna form, sem er 24 cm í þvermál, og setjið deigið í formið. Bakist í 30 – 40 mín við 180°C. Berið fram með þeyttum rjóma og karamellusósu:
120g smjör
115g púðursykur
½ tsk vanilludropar
¼ bolli rjómi
Soðið við vægan hita í 3 mínútur. Hrærið í á meðan.
UTILE et DULCI 
Hef fengið þessa köku hjá tveimur fyrirmyndarhúsmæðrum, Guffu og Signe. Algjört æði með rjóma. Ætla að baka hana um helgina, myndir koma síðar…
Þessa hef ég bakað nokkrum sinnum og alltaf jafngóð. Þannig að ég er greinilega fyrirmyndarhúsmóðir!!
Það ert þú svo sannarlega, aldrei hef ég komið til þín öðruvísi en að fá höfðinglegar móttökur, bakkelsi og nýmalað kaffi. Og eru ekki enn betri veitingar framreiddar í nýja eldhúsinu?
Þú getur rétt ímyndað þér! Komdu sem fyrst!
Þessi dýrindis kaka var bökuð í sumarbústað um helgina og stóð undir öllum væntingum. Reyndar gleymdist að hafa sykur með í farangrinum og eftir mikla leit í skápum hússins fannst kanelsykur í krús og var hann notaður.Það passaði bara mjög vel. Svo var ekkert lausbotna form, 24 cm í þvermál, í húsinu svo deiginu var bara skellt í eldfast mót og það kom ekki heldur að sök. Það er ekkert að marka uppskriftir.