Sú rödd var svo fögur

Karl minn færði mér að gjöf tónleikadiskinn með Vilhjálmi Vilhjálmssyni. Haldnir voru fjölsóttir minningartónleikar um hann í Laugardalshöllinni í október sl. en þá voru liðin 30 ár frá því að hann fórst í bílslysi i Lúxemborg. Hann var fæddur 11. apríl 1945 en er síungur og sígildur. Ég hef verið aðdáandi Vihjálms í áratugi og fór á tónleikana í Salnum sem voru ógleymanlegir. Þessi diskur hefur verið í spilaranum síðustu daga og að öðrum flytjendum ólöstuðum slær Egill Ólafsson í gegn hjá mér með kynþokka og sprengikrafti, dásamlegri rödd og ómótstæðilegri útgeislun. Sjáið og heyrið hann taka Jamaica með stæl, aðeins fýlupokar geta setið kyrrir.

Sigga min á afmæli í dag. Hún er mikil heimskona og ævintýragepill og setur lit á tilveruna.

Það styttist í jólin. Hér eru jólakortin í ströngu hönnunarferli og  nokkrar jólagjafir hafa verið keyptar (búnar til – not). Búið að kveikja á kertum og fá sér púrtvín, þetta er allt að koma. Annað kvöld verður ýsa með hömsum og á föstudaginn er súpa og kósíheit með vinkonum, svona á þetta að vera.

Óvissa er alltaf vond og skapar mikla streitu. En nú er henni eytt og loksins orðið ljóst hvernig stjórnvöld ætla að bregðast við kreppunni. Þjóðráðið er s.s. að almenningur borgi brúsann með lakari lífskjörum, hærri sköttum, rýrari velferð og vaxandi skuldabyrðum. Að hækka verð á matvælum, bensíni og brennivíni (sem hækkar húsnæðislánin í leiðinni), skera niður í menntastofnunum og sjúkrahúsum, þetta eru aldeilis frábær ráð! Þetta er það eina sem þeim dettur í hug þótt setið hafi verið yfir þessu á löngum fundum og menn hafi varist allra frétta íbyggnir á svip. Þurftu  menn virkilega 3 mánuði til að finna þetta út,  var þetta ekki fyrirsjáanlegt? Þessi niðurstaða hlýtur að kalla á að þeir stóðu að öllu klúðrinu verði kallaðir til ábyrgðarinnar sem þeim var treyst til og fengu greitt fyrir að bera á sínum tíma, eignir þeirra teknar upp í kreppuskuldir og þeir sinni síðan samfélagsþjónustu í nokkur ár. En hvernig á að knýja það fram? Hafa stjórnvöld styrk og ekki síst sómatilfinningu til þess? Höfum við, almenningur, þor og dug til þess að heimta það? Eða sitjum við svekkt og fúl við eldhúsborðið og röflum, og höldum svo áfram að láta fara illa með okkur?

Nýja platan (diskurinn) hennar Ragnheiðar Gröndal, Bella and her black coffe, er einstaklega ljúf og falleg. Ég þurfti að hlusta á hana nokkrum sinnum til að meðtaka hana en ég er mikill aðdáandi Vetrarljóða. Ragnheiður slær á milda jazztóna og syngur með sinni afskaplega fallegu rödd (allt á ensku…) og Guðmundur Pétursson, snillingurinn sæti með flottasta nef og krullur sem til eru, spilar undir. Meiriháttar kósístemning í skammdeginu.

Það var aldeilis tekið til hendinni heima um helgina. Herbergi sonarins var málað og settar upp dýrindis hansahillur sem mér áskotnuðust (takk Ester!). Þær eiga sér sögu frá nýliðinni öld en þær prýddu um árabil heimili Jónu frænku í Þverholti á Þórshöfn og síðast veggi bernskuheimilis míns að Víðilundi 14 a á Akureyri þar sem Ester býr nú rausnarbúi. Hillur þessar eru svo snilldarlega einfaldar, úthugsaðar og sígildar að það er leitun að öðru eins. Veit einhver hvaðan nafnið „hansa“ er komið og hver á  heiðurinn af hönnuninni? Ég finn ekki einu sinni mynd á netinu.

Hvernig er hægt að bjóða fólki upp á það sem lausn að fá að „leigja“ húsið sitt áfram eftir að maður er kominn með húsnæðislán í greiðsluþrot? Hvernig er hægt að láta viðgangast að fólk skuldi í árslok heilum árslaunum meira í húsnæðinu þótt það hafi borgað af því í hverjum mánuði? Hví líta stjórnvöld á vísitölu og verðtryggingu sem náttúrulögmál? Er ríkisstjórnin ekki núna orðin leppstjórn Alþjóðagjaldeyrissjóðsins? Svei mér þá, ég held ég vilji kosningar eftir allt saman- nei, byltingu!

Þar sem fjölmiðlar eru málgagn hagsmunablokka, ganga fyrir auglýsingum og samkeppni lítil spretta upp óháðir miðlar þar sem rödd fólksins heyrist. Sjá t.d. nei og smuguna.

Böl okkar eða bjargvættur? Gulu löndin í sömu stöðu og Ísland. Tekið af smugan.is

Eftirlaunalögin í fullu gildi en alþýðan herðir sultarólina

Guðni er sniðugur. Ekki bara orðheppinn heldur kann hann líka á heppilegar tímasetningar. Hættir í pólitík núna með miklu drama þegar allt er í kaldakoli og fer þá skv.lögum auðvitað beint á eftirlaunin fínu  sem hann skammtaði sjálfum sér.