Í kveld er samkvæmi. Börn barna ömmu og afa á Akureyri ætla að hittast ásamt mökum sínum og skemmta sér saman. Við erum ss systkinabörn. Allt er þetta bæði fallegt og skemmtilegt fólk. Það er mikilvægt nú sem aldrei fyrr að halda tengslum við ættingja sína og vini, rækta sambandið og njóta samvistanna. Þann 3. janúar er svo annað samkvæmi þar sem afkomendur ömmu og afa í Ásgarði gera sér glaðan dag. Það er líka bæði fallegt og skemmtilegt fólk. Svona er maður af góðum ættum.
Ýmislegt
Engin jól eru án jólaboða
Við systur skiptumst á að halda jólaboð á annan í jólum fyrir stórfjölskylduna þar sem mamma og pabbi eru heiðursgestir. Í ár var boðið hér í Hrauntungu og var glatt á hjalla. Gunna sá um glæsilegan forrétt, Brynjar eldaði dýrindis nautasteik með eðalsósu eftir kúnstarinnar reglum og Þura bauð uppá berjaís undir heitum marenshjúpi. Svo var farið í pakkaleikinn fræga og gantast fram á kvöld. Allir voru mættir nema Óttar V sem er í vellystingumí sveitinni en Arnþór Brynjarsson sá um að halda uppi stuði í hans stað. Hér er uppskrift af kartöflumús sem var í boðinu og er einstaklega jólaleg (sjá fremst á myndinni í ferköntuðu eldföstu móti):
JÓLALEG KARTÖFLUMÚS MEÐ PEKANHNETUM
3-4 meðalstórar sætar kartöflur (1 kg), 70 g smjör, 1 msk púðursykur, 1 tsk kanell, negull á hnífsoddi og slatti af pekanhnetum. Aðferð: Skræla kartöflurnar og skera í bita, sjóða í léttsöltu vatni í 10-15 mín. Stappa með gaffli eða hræra örstutt í Kitchen Aid. Blanda saman bræddu smjöri, púðursykri, kanel og negul (kanli og negli?) og hræra útí kartöflumúsina. Setja í eldfast mót, strá pekanhnetum yfir og baka í 10-15 mín, ca. 200°C.
Jólaundirbúningur, 23. des.
Pabbi hamflettir rjúpur
Toblerone-ísinn
Hrísgrjónaröndin. Uppskrift frá mömmu sem hefur haft hana í eftirrétt á jólum síðan 1962. Með henni er dásamleg rjómakaramellusósa
Jólastuðlag
Hver kemst ekki í stuð við þetta dásamlega jólalag? Kenny hefur rosa sexí rödd og Dollý klikkar hvorki á lúkkinu né háu tónunum.
Aðventa
Í dag komu góðir gestir í Hrauntungu. Magnús „litli“ og Inga átu og skreyttu piparkökur og við Sossa þömbuðum glögg, pabbi kom með vísnagátur og gamanmál og Gunna og fjölskylda litu inn en þau voru í kaupstaðarferð. Ég var búin að baka áströlsku bombuna sem var étin upp til agna. Svo skruppum við Inga um sjöleytið til Steinunnar Har og Grétars í dýrindis kjúklinga- og grænmetissúpu. Um kvöldið var afmæliskaffi á Vatnsenda hjá Bryndísi Heiðarsdóttur. Svona er aðventan, allir á ferð og flugi, líf og fjör.
Mæðgur á góðum degi
Þá er búið að skrifa jólakortin í ár, við kertaljós og jólasálmasöng. Þeir ættingjar og vinir sem eru í náðinni fá risastórt kort með fermingarmynd af Ingu, glóandi af gleði og bjartsýni. Þegar ég var á hennar aldri var ég frekar týnd og vissi ekkert í hvorn fótinn ég átti að stíga. Veit það varla enn…
Klovnen
Klovnen í gær, hann getur nú alveg drepið mann!
Í kvöld er ég að fara á námskeið um Faust, þann glóp og trúð sem seldi sálu sína.
Bruðl
Mig hefur langað í þennan kertastjaka í nokkur ár en alltaf fundist það bruðl að spandera í hann, ekki síst eftir að kreppan skall á. Svo á ég líka fullt af kertastjökum. En nú þegar ég hef fengið nokkra þúsundkalla útborgaða fyrir ritdóma og nefndarstörf ákvað ég að láta það eftir mér að kaupa mér hann, á uppsprengdu verði í Epal. Nú trónir hann í stofunni og ég hef ekki af honum augun.
Ásdís Rán
Mér finnst Ásdís Rán algjört æði í Lottó-auglýsingunum. Hún gengst upp í ímyndinni og gerir botnlaust grín að henni um leið. Þetta kemur snilldarvel út.
Ástin á Hagstofunni
Ég fór á hinn stórskemtilega vef Hagstofunnar og fann út eftirfarandi:
Á Íslandi búa 886 sem eiga afmæli þann 7. október, þar af 17 sem fæddust þann 7. október 1963
Hverjar eru líkurnar á að 2 x 071063 hittist og felli hugi saman?
UTILE et DULCI 
