Prúðbúnar Buddur, hver annarri fegurri og skemmtilegri. Við erum 13 á myndinni, tvær frænkur vantar. Við erum afkomendur fimm systkina frá Þórshöfn á Langanesi, þeirra Skúla, Diddu, Óla, Jónu, og Lillu, og höfum alla tíð haft samgang okkar á milli. Við erum bestu frænkur og vinkonur sem hittumst af og til í heimahúsum og höldum svo veglega árshátíð saman ásamt bæði gömlu Buddunum og nokkrum heiðursbuddum. Þetta er óendanlega dýrmæt vinátta og frændsemi sem við ræktum af alúð ævina á enda.

Þá er komið að hinum árlega hittingi hjá Buddum. Mikið er maður lánsamur að eiga svo margar fallegar og skemmtilegar frænkur og vinkonur um land allt. Við verðum 15 kellur saman í stanslausri gleði og geimi alla helgina.

Inga var á árshátíð um daginn í Kópavogsskóla og þá var þessi mynd tekin. Hún er hér með bestu vinkonunum sínum, Ísabellu og Erlu.

Árshátíð MK var í gær, gamla dubbaði sig upp.

Við erum með DV í prufuáskrift. Sumt er beitt og annað heitt í blaðinu. Þar eru svaðalegar fréttir af einelti, vændi og ofbeldi, slúður af frægu fólki og æsisögur af venjulegu fólki sem er órétti beitt (fær ekki að taka dót úr gámi sem er ekki á nafni viðkomandi, sviptur bótum af því hann sendi hótunarbréf til vinnumálastofnunar o.fl.). Ekki eru allar fréttirnar vandaðar eða vel skrifaðar en þó eru gullmolar innan um. Safaríkustu fréttirnar eru uppljóstranir um sukk og svindl og nákvæmar útlistanir á hvernig nafngreindir  menn sölsuðu undir sig og drógu að sér eignir og fé fyrir og í skjóli hrunsins en aðrir fjölmiðlar virðast ekki sinna því að neinu marki nú orðið. Og það sem verst er, margir eru orðnir dofnir fyrir fréttum af milljörðum sem gufuðu upp og hafa sætt sig við að borga reikninginn, orðnir svefngenglar og þrælar. Áfram DV!

Frumburður minn og einkasonur, Óttar, á afmæli í dag, hann fæddist á FSA kl. 17.02 fyrir tuttugu og fjórum árum og er alveg dæmigerður hrútur. Til hamingju!

Inga (t.v.) og Erla sýndu dans með JSB í Borgarleikhúsinu við mikinn fögnuð. Þær eru hér farðaðar sem Jókerinn, ansi skrautlegar.

Inga og afi læra undir próf. Námsefnið heitir Skerpa en afinn vitnar sífellt í íslenska málfræði Björns Guðfinnssonar. Eitt verkefnið í Skerpu var að yrkja ferskeytlu og það stóð ekki á henni hjá afanum: Gera vil ég Skerpu skil, skrifa ljóð og sögur, á eftir sofna sætt ég vil, svona upp úr fjögur.

Ég er að spá í Twitter. Skilst að þar sé fjör, hægt að afla sér viðskiptasambanda, þekkingar og fróðleiks. Er Twitter eitthvað spennandi og er einhver þar sem ég þekki? (139 stafir)

Ásgrímur Angantýsson varði doktosritgerð sína í HÍ í gær við hátíðlega athöfn. Vörnin tókst vel, andmælendum tókst hvergi að reka hann á gat. Enginn kemur að tómum kofanum hvað aukasetningar varðar hjá doktor Ásgrími eða Gromma eins og hann var jafnan kallaður á mínu heimili þegar hann var lítill. En hann er ekki bara eldklár, hann Ásgrímur frændi minn,  heldur líka bæði fallegur og góður. Hann er hógvær snillingur,  lítillátur að eðlisfari og algjör ljúflingur.