Ýmislegt

ja hérna

Frændur og fóstbræður

Hér hafa verið góðir gestir sl. þrjár vikur, þeir Siggi Magg og Eiríkur Arnar, frændur Brynjars. Þeir bræður hafa verið með risaskómarkað í Molduhrauni. Siggi og Brynjar hafa verið vinir og fóstbræður frá blautu barnsbeini en eru samt ekki alltaf eins klæddir þótt þeir séu það á þessari mynd. Það er búið að vera mjög gaman að hafa þessa góðu gesti. Í gærkvöldi fórum við öll á Sushi í Iðu og átum fisk af færibandi.

Lokað í Bláfjöllum

Mér finnst það góð hugmynd hjá „predatornum“ / geimverunni Jóni Gnarr að loka Bláfjöllum í tvö ár í sparnaðarskyni. Þótt það geti hugsast að mann langi til að bregða sér á skíði einhvern daginn þá er það vissulega munaður sem hægt er að vera án. Í lúxusnum eigum við að spara og skera miskunnarlaust niður þar til betur árar, en minna i í t.d. heilbrigðis- og menntamálum. Ég horfði á Kastljósið í gær og er hrifin af því hvernig Jón gefur pólitísku froðusnakki langt nef og beitir öðru tungutaki og fersku myndmáli. Ég vona að hann falli aldrei ofan í skotgrafirnar eða leggi fyrir sig nöldur og hæðnisglósur eins og tíðkast meðal stjórnmálamanna, heldur hafi alltaf heiðarleika og almannaheill í öndvegi. Þá getum við kannski einhvern tímann vænst endurreisnar.

Áfram stelpur

Leikritið Ertu nú ánægð kerling? var sett upp af Leikfélagi Þórshafnar á níunda áratugnum við góðar undirtektir.  Stykkið var sýnt í félagsheimilinu,  flottur söngur og frábær hljómsveit, sungin voru lögin af hinni stórskemmtilegu baráttusöngvaplötu Áfram stelpur og textarnir voru á hvers manns vörum. Platan fékkst svo í kaupfélaginu og var auðvitað spilað gat á hana. Efni plötunnar er jafnrétti kynjanna og staða kvenna, bæði lög og textar í  hæsta gæðaflokki. Ég ætla því ekki  að missa af Áfram stelpur í kvöld.

Föt

„Ég á engin föt til að fara í“ er oft mín fyrsta hugsun á morgnana og þegar eitthvað sérstakt stendur til.  Við Inga tókum fataskápinn minn í gegn um helgina, fylltum svartan ruslapoka af fötum sem ég hef ekki klæðst sl.  2-4 ár en hafa bara hangið og safnað ryki og verið fyrir mér þegar ég hef verið að gramsa eftir einhverju til að vera í.  Nú hefur öllu verið raðað fallega í skápinn og eru þar núna m.a. 7 pils og 5 kjólar, 17 langerma efripartar, 11 peysur, tvær buxnadragtir og þrjú vesti, 12 stuttermabolir og 5 pör af buxum. Svo ég ætti að geta fundið eitthvað til að vera í á morgun.

Óttar Einarsson sjötugur

Bókin hans pabba

Pabbi minn heittelskaður er sjötugur í dag og hélt glæsilega veislu í Haukaheimilinu í gærkvöldi. Atli  á Jarðbrú (í hinum ægifagra Svarfaðardal þar sem pabbi  var skólastjóri á Húsabakka til ársins 1972) sendi okkur myndir sem hann tók og lýsti þessu öllu saman á flickr-síðu sinni. Margir lögðu hönd á plóg til að gera veisluna sem best úr garði og kunnum við systur þeim öllum bestu þakkir.  Ræður og skemmtiatriði frá gestum voru á heimsmælikvarða, maturinn frábær og stemningin afar góð. Margir komu um langan veg til að heiðra afmælisbarnið og afar gleðilegt var að amma mætti og var eins og drottning, 93 ára. Í tilefni afmælisins gaf hann út bók með vísum eftir sig sem gestum gafst kostur á að kaupa á vægu verði en hann frábað sér allar afmælisgjafir.