Ég ætla rétt að vona að kvikmynd Þorfinns Guðnasonar og Andra Snæs, Draumalandið, sé reglulega sýnd í öllum grunn- og framhaldsskólum landsins. Þar sést skýrt og greinilega að íslenskir stjórnmálamenn hafa verið og eru enn gráðugir og heimskir og að þeim er skítsama um land og þjóð. Að sjá forsetann, Davíð Oddsson, Geir Haarde, Halldór Ásgrímsson og Valgerði Sverrisdóttur selja erlendum auðhringum og þungaiðnaði landið án þess að depla auga, það er hrikalegt. Sjá afleiðingar virkjunarinnar á Austurlandi á land og gróður, fólk og dýralíf er hrikalegt. Sjá glæpi, mútur og eyðileggingu Alcoa um heim allan, t.d. í Ástralíu er hrikalegt. Það er úthugsað hvernig fólki er talin trú um að hagvöxtur, þróun, framfarir, tækifæri og uppbygging fylgi álveri. Þjóðinni ber heilög skylda til að spyrna við fótum, láta ekki glepjast heldur varðveita náttúru Íslands, ekki bara okkar vegna heldur heimsins alls.
Ýmislegt
Parísardaman
Inga dís er í París, Frakklandi! Spókar sig þar með föður sínum eins og hefðardama. Henni finnst alveg jafn spennandi að skoða Eiffel og HM.
Lasarus
Arwen skógardís
Nú hef ég legið veik heima í tvo daga. Er svei mér þá ekkert skárri í dag en í gær. Með hastarlegt kvef og nefrennsli, þurran og óstöðvandi hósta, hausverk og beinverki. Arwen hefur veitt mér selskap, kúrt við rúmið mitt og vorkennt mér ægilega, ég sé það í brúnu augunum hennar fullum af tryggð og væntumþykju. Á meðan við dormum er Icesave í uppnámi, ríkisstjórnin handalaus, fólk atvinnulaust og skuldugt upp fyrir haus og almennt farið að missa trúna á þetta geti nokkurn tímann farið vel. Það er allavega mikilvægt að ná heilsu á ný svo maður geti haldið áfram að tutla upp í lánin sín, það eru víst bara stórbokkarnir sem sleppa við það og fá þau afskrifuð.
Danskt popp
Hver stenst það?
Fögur fyrirheit
Nú er vorhugur í mér. Ég skráði mig á 6 vikna átaksnámskeið í Hreyfingu í dag. Ætla að vera dugleg að mæta og púla, styrkja mig og liðka. En get ég látið sjá mig í teygðum kvennahlaupsbol og í útvíðum leikfimibuxum sem er orðnar snjáðar á rassinum? Og íþróttaskóm með málningarslettum? Nei, nú verður farið á stúfana og úrvalið í sportfatnaði kannað. Ber ekki dressið mann a.m.k. hálfa leið?
Vetrarfrí
Við Inga erum í vetrarfríi. Búnar að baka bollur og ástralska bombu (döðlukökuna miklu), fara á kaffihús, láta gera við bremsurnar á bílnum, sofa út og hanga í tölvunni. Bara næs.
Hörmulegur hárdagur
Í dag er „Bad Hair Day“ í vinnunni. Menn eru með kollur, rúllur, gel og húfur og allir hinir furðulegustu ásýndum.
Seinkum klukkunni
Ég styð þá hugmynd að klukkunni verði seinkað til samræmis við tímatal siðaðra þjóða. Það er fáránlegur óþarfi að rífa sig upp og draga börnin fram úr volgu bólinu eldsnemma morguns og æða í flýti og stressi út í myrkur, snjó og kulda. Það er kappnóg að mæta kl 9 á morgnana, nýta bara tímann betur í vinnunni. Í leiðinni vil ég stytta vinnutímann og opnunartíma verslana þannig að allir séu komnir heim í ró, samveru og öryggi milli fjögur og fimm á daginn. Lifum í birtunni, ljósinu og njótum tómstundanna.
Hvaða kvennalið?
Ég heyrði í sjónvarpinu einhvern segja um glæstan sigur Frakka á EM í handbolta að þetta væri í fyrsta sinn í veraldarsögunni sem íþróttalið hampaði þremur titlum, þ.e. heimsmeistarar, ólympíumeistarar og evrópumeistarar allt í senn. Að vísu hefði þetta áður gerst í kvennaboltanum… ég sperrti eyrun en svo var ekki sagt neitt meir. Telst það ekki með? Veit einhver hvaða lið þetta var, hvenær og í hvaða íþróttagrein? Er þetta ekkert merkilegt nema hjá karlaliði?
UTILE et DULCI 