Góðir gestir komu í kvöld, Eiríkur Arnar og Siggi Magg, vinir og frændur Brynjars. Kjúklingur og rískubbar í matinn, kaffi á eftir og djúpar samræður. Það er svo gaman þegar gestir koma, látið sjá ykkur!
Haustið
Það rignir mikið þessa dagana en það er ekkert gefið eftir í göngutúrunum með hundinn. Hér má sjá Arwen hlaupa af sér hornin í dag, í dimmum og dularfullum haustskógi (…göngustígur hérna rétt hjá).
Niðurskurður
Í Menntaskólanum í Kópavogi á að skera niður í rekstri um 65 milljónir króna skv. fjárlögum. Það þýðir að það þarf að segja upp 10 kennurum og hafna um 100 umsóknum nemenda. Hvað fara þessir kennarar að gera? Þeir fara flestir á atvinnuleysisbætur. Hvað gerir þetta unga fólk sem hvergi fær skólavist? Það er viðbúið að það fari flest á atvinnuleysisbætur, hangir svo í tölvunni og yfir sjónvarpinu, leiðist út í afbrot og fíkniefni, þunglyndi og örvæntingu. Er öruggt að þetta sé einhver sparnaður þegar horft er til lengri tíma? Það eru nógir peningar til, er etv hægt að hagræða og nota peningana skynsamlegar í stað þess að skera niður?
Hitað upp
Í skammdeginu er voða gott að skella þessu evrótrashi í spilarann, þetta er sjóðheitt og fullt af stuði fyrir eilífðargelgjur eins og mig.
Hrísgrjónagrautur
Í kvöld er hnausþykkur hrísgrjónagrautur á borðum, með rúsínum og kanel, ásamt digrum blóðmörskepp. Galdurinn við góðan graut er að láta hrísgrjónin (nota grautargrjón, ekki venjuleg hrísgrjón og alls ekki eitthvað basmati – jasmín eða neitt slíkt) liggja í vatni í amk 1-2 klst áður en grauturinn er soðinn. Sjóða svo hægt og lengi, hræra oft og ekki spara mjólkina. Alls ekki fara eftir uppskrift Helgu Sig (1991:36) sem reiknar sér í mesta lagi hálftíma í verkið. Mikla þolinmæði og alúð þarf í þennan rétt sem ég er nú alls ekki viss um að sé sérlega hollur en hann er ódýr, bragðgóður og saðsamur.
Rokk og ról
Unga fólkið kann alveg að rokka, það er eins og Rúnar F hafi rokkað í tuttugu ár. Ekta gamaldags stuðlag með góðu trukki og batnar við hverja hlustun.
Kvöldverður á Hereford
Afmælisbörnin fóru á Hereford í gærkvöldi til að gera sér dagamun. Þar er tilboð í gangi í október, humar í skel, önd orange og marengsturn á 5.990. Humarinn var aðeins of mikið eldaður (fjórir litlir halar), öndin var ekkert spes, sósan var ágæt, grænmetið óspennandi en fandant-kartaflan mjög góð. Desertinn var svona la la. Jindalee rauðvínið var hins vegar mjög gott (Merlot). Við getum ekki mælt með þessu tilboði hjá Hereford, því miður. Það vantaði alla alúð í þetta. Þjónninn stóð sig vel, staðurinn var troðfullur af túristum.
Ammæli
Það er afmæli í dag! Við erum 46 ára, gamla settið. Brynjar ætlar að setja á sig þverslaufuna í tilefni dagsins.
Veturinn
Þá er húsbíllinn kominn í geymslu og veturinn má halda innreið sína. Þessi mynd var tekin um borð í sumar, ansi hreint huggulegt hjá okkur.
Afmæli
Pabbi á afmæli í dag, 69 ára. Hann er einstakt ljúfmenni, húmoristi, mikill jafnaðarmaður, hagmæltur, skapgóður og blíðlyndur, bókhneigður og ástríkur faðir og afi. Til hamingju með daginn!
