Uppskriftir

Mínar eigin, ekki verið prófaðar á dýrum

Veislupasta Buddos 25

Í uppskriftinni er bæði slumpað og sleppt.

Pasta soðið og kælt og sett í stóra grunna (iitalla)skál, góðri olíu hellt sparlega yfir, saltað og piprað. (Kjúllabringur (má sleppa) steiktar og kryddaðar og kældar og skornar í bita og sett í skálina). Ruccola / klettasalati stráð yfir. Kjúklingabaunir ristaðar í airfryer eða ofni í ca 10-20 mín, vökvanum hellt af og olíu og rósmarín stráð yfir. Sett í skálina þegar þær eru stökkar að utan og mjúkar að innan. Olía og pestó hrært saman og hellt yfir grænmetisblöndu: kokteiltómatar, avocado, paprika, agúrka, rauðlaukur, ólífur svartar og grænar. Fetasalatostakubbur og sólþurrkaðir tómatar: skorið í bita. Hrært í og hellt yfir pasta (og kjúlla). Cesar salat dressing hellt yfir. Trönuberjum, pekanhnetum og pistasíuhnetum stráð yfir, góðri jómfrúarolíu hellt yfir og parmesan rifinn yfir. Kryddað með salti og pipar og heitu pizzu/pastakryddi frá Pottagöldrum. Brauðteningar (croutons) ef vill. Nokkrar mjóar gusur af balsamediki á toppinn gera gæfumuninn. Það má sleppa ýmsu af því sem hér er upptalið og nota það sem til er í ísskápnum. Kalt hvítvín með og hvítlauksbrauð.

Veisla á Selá, 4. okt 2025

Sætkartöflusúpa Heiðrúnar

Ég elska heitar og heimagerðar súpur. Fékk þessa fínu súpu hjá Heiðrúnu minni á Þórshöfn í sumar. Prófaði að elda hana hér í borginni en átti ekki alveg allt sem átti að vera en kona bjargar sér og nennir ekki útí búð eftir e-u smáræði. Súpan endaði svona:

1-2 sætar kartöflur, 1 l vatn, 1-2 laukar, 3-4 hvítlauksrif, 1 rauð paprika og/eða hálft epli, 1 msk grænmetiskraftur, salt og pipar, safi úr sítrónu eða límónu, duglega cummin, chiliduft og smá kanill

Sætu er flysjaðar, brytjaðar og soðnar í vatni þar til þær eru mjúkar. Vatninu hellt af. Hitt grænmetið steikt á pönnu í kryddinu. Allt sett saman og 1 l af vatni bætt í. Malla bara nógu lengi og mauka síðan með töfrasprota – það geri ég annars aldrei við súpur en þessi er góð svona mjúk og kremuð. Bæta svo við rjóma/hafrarjóma. Skreyta með steinselju og rjómataumi ef vill. Gott að hafa kaldhefað brauð með, það fékk ég hjá frænku! Brauðið á líka rætur til Þórshafnar, sjá hér söguna af því.

Mulningsbaka Nadiyu

half_a_pear_crumble_83241_16x9.jpgSá þessa í sjónvarpinu!

Flysja perur (hálf á mann) og skera í tvennt og hita í potti, í eplasafa eða rauðvíni í ca hálftíma með vanillu úr einni stöng

25 g smjör og  25 g hveiti og 25 g hrásykur og 100 grömm af múslí hrært saman

Veiða perur upp og setja í eldfast mót og nota safann í pottinum til að búa til sýróp með 150 g af hrásykri, hita rólega þar til það er orðið að karamellu

Setja marsipankúlu (eða eitthvað gott) í holurnar á perunum og klessa deiginu oná, inn í ofn í 20 mín.

Taka út, einn peruhelmingur á mann með ísskúlu og sýrópi.

 

 

 

 

Letipasta

Ef þetta er ekki rétti kvöldmaturinn á blautu og hvössu sunnudagskvöldi, þá veit ég ekki hvað það ætti að vera. Allt í einum potti, ótrúlega einföld og fljótleg matreiðsla.

2013-07-02-22-11-51

http://grgs.is/2013/07/02/letipasta/

Þetta mallar núna og tekur svo stuttan tíma að ég er varla byrjuð á Montes Reserva, 2014 Merlot frá Chile sem er afskaplega flauelsmjúkt og bragðgott. Er einhver sem vill koma og snarla með mér?

 

 

 

 

Einfaldur grænmetisréttur með karrýi

Einfaldur grænmetisréttur var á borðum í gærkveldi. Karrímauk og olía á pönnu. Hálfþreytt grænmeti úr ísskápnum: hálfur laukur,  hálft epli, hálf sæt kartafla skorin í strimla, 3 skorpnar gulrætur, frekar óþroskað avokadó, 1-2 hvítlauksrif og kjúklingabaunir sem ég á alltaf til soðnar og frystar. Steikt mjúkt, ein dós kókosmjólk yfir og látið malla. Bæta við 3-4 niðursneiddum döðlum og 10 rúsínum. Kryddað með meira karrýi ef vill og kóríander, kókosmjöli stráð yfir áður en rétturinn er borinn fram.

Rétturinn kraumar á pönnunni

Gunna borðaði með okkur og lét vel af sér

Grilla eitthvað nýtt

Það er hægt að grilla fleira en kjöt og pylsur. Þessa uppskrift rakst ég á um daginn:

Grillaðar sætar kartöflur

  • 3 sætar kartöflur, með hýði
  • Salt
  • 2-4 tsk rifinn börkur af læmi, hvað viltu hafa þetta sterkt?
  • cayennepipar eftir smekk
  • olía, 1 dl ca
  • nýmalaður pipar
  • kóríander, ferskt og fínsaxað

Sjóða kartöflurnar í léttsöltu vatni þar til þær eru soldið mjúkar, kæla. Blanda saman salti, rifnum læmberki og cayenne pipar í skál. Skera hverja kartöflu langsum í sneiðar (með hýðinu á). Leggja þær á heitt grill. Pensla kartöflurnar með olíu. Grilla í ca 1-1/2 mínútu á hvorri hlið.  Færa yfir á disk, krydda strax með saltblöndunni og strá síðan fersku kóríander yfir.

Hollar smákökur

Þessar verða búnar á morgun

Til að gera „hollar“ smákökur er þjóðráð að nota spelt  i staðinn fyrir hveiti, hrásykur í staðinn fyrir sykur, vínsteinslyftiduft, og smjör eða kókosolíu í staðinn fyrir smjörlíki. Nota svo 70% súkkulaði og duglega af hnetum og möndlum, döðlum og rúsínum, hafragrjónum og kókosi. Kökurnar verða mýkri og geymast e.t.v. ekki eins lengi en hver er að geyma smákökur inn í eilífðina? Tvær sortir úr kökubók Jóa Fel lágu kylliflatar í kvöld: döðluspes og konfektsmákökur.

Speltbrauð með tilbrigðum

Hér kemur margumbeðin uppskrift að speltbrauði Sólveigar Eiriks sem hefur verið á borðum í Nuskin-kynningum hjá mér. Uppskriftin er á bls. 58 í Grænn kostur Hagkaupa.

5 dl spelt (fínt eða gróft eða bæði)

1 dl bragð- og þurrefni eins og t.d.  músli, sesamfræ, kókosmjöl, hafragrjón, graskersfræ, birkifræ eða annað sem til er í skápnum, rúsínur, 3-4 döðlur og rifin gulrót gera kraftaverk, líka gott að setja sólþurrkaða tómata, hvítlauk eða  ólífur

3 tsk vínsteinslyftiduft

1 tsk sjávarsalt (ég set líka krydd frá Pottagöldrum, t.d. ítalskt eða pastakrydd, og smá kúmen. Sumir setja örlítið agavesýróp)

1,5-2 dl sjóðandi vatn

1,5-2 dl ab-mjólk eða soyjamjólk eða bæði

Setja þurrefnin í skál (svo döðlur (smátt skornar), rúsínur, rifin  gulrót o.fl.), bæta vökvanum við (vatnið síðast). Hræra lítið og hella svo í aflangt form. Baka í ca hálftíma við 200°C.