Ýmislegt

ja hérna

Einar Kristjánsson frá Hermundarfelli

Í tilefni af því að liðin verða hundrað ár frá fæðingu afa míns, 26. okt. 2011, var í dag haldið samsæti honum til heiðurs. Þar var stutt dagskrá með ræðu og söng síðan var  hulunni svipt af síðu eða bloggi þar sem safnað er saman efni um hann, einarkristjansson.wordpress.com. Afi var rithöfundur, hagyrðingur, útvarpsmaður og afar músikalskur en hann gerði plötu þar sem hann spilaði á tvöfalda harmónku. Han lést 6. júlí 1996. Um 70 manns komu og glöddust saman, rifjuðu upp kynni sín af afa og fjölskyldunni. Sérlegur heiðursgestur var amma sem komin er á tíræðisaldur og lætur engan bilbug á sér finna.

Framkvæmdir

Nú eru að hefjast framkvæmdir hér á heimilinu. Búið er að rífa allt innan úr baðherginu, bera steypuklumpa og flísabrot út í stórum fötum og keyra nokkrar ferðir í Sorpu.  Í fyrramálið mæta hér vaskir iðnaðarmenn sem hafa lofað að vera hálfan mánuð að búa til draumabaðherbergið.

Tækni og vísindi
Fyrsta poddmyndin, tók hana í Harvard Coops

Fyrsta kvöldið í Boston, 5. okt., var fréttatíminn undirlagður af andláti Steve Jobs, „an Entrepreneur and a Business man, always a step ahead…“ Applebúðin er glerhýsi á þremur hæðum og á gangstéttina hafði fólk lagt blóm og kerti,  hálfnöguð epli og orðsendingar eins og: Steve, you made our lives richer, We love you…“ Ég keypti mér Ipod Touch og er að fikra mig áfram með að læra á hann. Er soldið eins og risaeðla, kann ekkert á svona snertiskjá. Tókst samt að hlaða inn 2 dægurlögum á poddinn með aðstoð Ingu. Allt viðmótið er einfalt, lógískt og smart; myndir, tónlist, net, litlir forritsstubbar, e-bækur omfl. Ég er heilluð.

Átthagafélag Þórshafnar og nágr.

Það líður að árlegum vetrarfagnaði átthagafélags Þórshafnar og nágrennis, 22. okt nk. Árið 2008 hélt ég ræðustúf undir borðum á vetrarfagnaðinum þar sem ég rifjaði upp gamlar og ljúfar minningar frá Þórshöfn. Læt hann fylgja hér: thorshafnarmot2008 svo menn komist í gott stuð og  mæti svo kátir og hressir á skrallið!

Skattaskjól

Ég las í blaðinu í morgun að skattrannsóknarstjóri sé að rannsaka fjölda skattaskjólsmála. Einhverjir stungu eignum og peningum undan og græddu verulega á hringlinu í kringum bankahrunið, t.d. með svokölluðum afleiðsluviðskiptum og gjaldeyrisbraski. Hagnaður af slíkum viðskiptum er skattskyldur, upp á 10%. Dæmi er tekið í blaðinu um að ef hagnaðurinn nemi fimm hundrað milljónum eigi skattur og sekt að vera 100 milljónir. Fimm hundruð milljónir, hvað eru það mörg ævistörf? Mér finnst alveg merkilegt að ef maður græðir á viðskiptum þá borgar maður 10% skatt en ef maður vinnur venjulega daglaunavinnu borgar maður 40%. Ætti þetta ekki að vera öfugt?

Verði ljós

Í dag rættist langþráður draumur minn um nýtt ljós yfir borðstofuborðið. Ég er búin að láta mig dreyma um það í nokkur ár og nurla saman fyrir því. Nú svífur það yfir borðinu og varpar frá sér svo fallegri birtu að ég hef ekki gert annað allan seinnipartinn en að dást að því.

Þá er seventís-ljósakróna, fimm arma, úr messing með sandblásnum glerkúplum til láns tímabundið. Verður bara send á gott heimili þar sem vel er hugsað um hana. Þetta er brúðkaupsgjöf frá ömmu á Vopna.