Ýmislegt

ja hérna

Meira ort um Óttar Einarsson

Óttar EinarssonÚr Bændablaðinu 21. febrúar

Þann 7. febrúar sl. lést í Hafnarfirði Óttar Einarsson skólastjóri og rithöfundur, einn ástsælasti hagyrðingur sinnar kynslóðar. Margar af vísum Óttars urðu landfleygar fyrir léttleika sakir og fágætrar kímni sem einkenndi hans eðlisgerð. Vísnahefðin var honum í blóð borin en eins og margir þekkja var Óttar sonur Einars Kristjánssonar frá Hermundarfelli, hins þekkta útvarpsmanns og vísnaskálds, og Guðrúnar Kristjánsdóttur frá Holti í Þistilfirði. Það er því afar viðeigandi að birta lesendum minningarljóð sem Jóhannes Sigfússon bóndi á Gunnarsstöðum orti frænda sínum og vini við hin döpru þáttaskil:

 

Árin stöðugt æða hjá,

eflist tímans hvinur.

Nú er Óttar fallinn frá

frændi minn og vinur.

 

Góður drengur genginn er

og gegn í alla staði.

Finnst mér verði að fylgja þér

ferskeytla úr hlaði.

 

Hennar bjarta stuðla stál

stöðugt þjóðin metur.

Ekki hafa íslenskt mál

aðrir rímað betur.

 

Ræktarsemi öll þín ár,

afar mikils virði.

Á grávíðinum glitra tár

í gamla Þistilfirði.

 

Ég átti fágæt bréfaskipti við Óttar á sl. vetri, sem verða sínu dýrmætari þegar hans nýtur ekki lengur við:

Höndin þó sé hætt að skrifa

háttum bundna stuðlagrein,

vísur þínar lengi lifa

og lýsa upp þinn bautastein.

 

Vísur Óttars einkenndust margar af óvanalegri kímni, og skopaðist hann oft að eigin viti og verðleikum:

Að sumu leyti Óttar er

afar klár og slyngur.

Annars bara eins og hver

annar vitleysingur.

 

Frá skólastjóraárum Óttars við Húsabakkaskóla í Svarfaðardal lifa ótal vísur og bragir.

Hver man ekki erindið sem hann samdi við lagboðann „Love me tender“:

 

Dalvíkin er draumablá

og dýrðleg til að sjá.

Ofar stendur Upsafjall

eins og gamall kall.

:Sólin skín á stein og stekk

og stúlku í fyrsta bekk.

 

Brageyrað sagðist Óttar hafa úr föðurættinni, en glaðværðina frámóður sinni.

Þessum einkennum hélt Óttar til hinsta dags þrátt fyrir erfið veikindi:

 

Óttar vantar aðeins hlíf,

axlar þunga byrði.

Yrkir sig í sátt við líf

sem er einskis virði.

 

Vín er ekkert voða gott,

varla tóbak heldur.

Að vera edrú finnst mér flott

og fínt að vera geldur.

 

Umsjón:

Árni Geirhjörtur Jónsson

kotabyggd1@gmail.com

Ort um Óttar Einarsson

Óttar EinarssonMorgunblaðið í gær:

Hagyrðingurinn Óttar Einarsson er fallinn frá og verður saknað á vísnaþingum. Björn Ingólfsson orti fallegar afhendingar er hann heyrði tíðindin:

Tímans megnar enginn á að ósi stemma,

Óttar genginn allt of snemma.

Þótt næsta hrygg við norpum hérna niðurdregin

mun húmor magnast hinum megin.

 

Ármann Þorgrímsson orti:

Fullkomið er frelsi hans

fjarri lífsins þrasi

stígur nú við dísir dans

og dreypir öls á glasi.

 

Óttar sá spaugilegu hliðina á tilverunni sem endranær er hann skrifaði á Leirinn í haust: »Maður gerist nú gamlaður og má segja að allt manns vit fari í að telja töflur og vigta skammta ofan í sig í þeirri veiku von að tóra a.m.k. daginn í dag – nú og hugsanlega daginn á morgun líka ef guð lofar.« Þessi staka hrökk »óvart« upp úr honum:

Tek ég lyf á lista skráð,

að lögum guðs og manna

og lifi fyrir líkn og náð

læknavísindanna.

 

Síðasta vísan sem Óttar sendi á Leirinn hljóðaði svo:

 

Er hún horfin þessi þrá,

þrá sem hlær og grætur?

Manni liggur ekkert á

allra síst á fætur!

WP 2012

Á tímum margvíslegra samskiptamiðla þar sem allt er á fleygiferð allan sólarhringinn er bloggið mitt eins og risaeðla. Ég  held samt mínu striki. Skv. árlegu yfirliti um umferðina á síðunni eru helstu álitsgjafar mínir 2012:

  • 1  Gunna 30 COMMENTS
  • 2  Steinunn 15 COMMENTS
  • 3  Þura Óttars 10 COMMENTS
  • 4  Silla 10 COMMENTS
  • 5  Jónína Ingibjörg 7 COMMENTS

Ég þakka ykkur fyrir tryggðina og þolinmæðina.

Vinsælustu færslurnar:

Kannski ekki þær sem ég hélt að yrðu mest lesnar. Og þessa ráðleggingu fékk ég:

Some of your most popular posts were written before 2012. Your writing has staying power! Consider writing about those topics again.

Og að lokum:

In 2012, there were 101 new posts, growing the total archive of this blog to 608 posts. There were 114pictures uploaded, taking up a total of 34 MB. That’s about 2 pictures per week.

The busiest day of the year was janúar 29th with 259views. The most popular post that day was 10 km eins og ekkert sé.

Aðventugeimið

Jólaaðventuboðið, sem nú er komin hefð á, lukkaðist vel þrátt fyrir heilsubrest húsmóðurinnar. Boðið var upp á jólaglögg, skinku og hamborgarhrygg og meðlæti. Á matarborðið bættist laufabrauð, tómata- og mozzarellapinnar, tortillur, gæsabringa með rauðkáli, ostur, sulta og hrökkkex, skyrterta og dajmdesert. Svo enginn fór svangur heim. Pakkaleikurinn fór vel fram en um tíma var hann tvísýnn. Samræður voru líflegar og vitrænar. Fram kom m.a. að hundar eru einstaklega gáfuð dýr, hjúkrunarfræðingar fá um 200 þúsund útborgað á mánuði, með aukavöktum og vaktaálagi, og að íslenska þjóðin greiddi á dögunum risastórt lán sem ríkisstjórn Gunnars Thoroddsens tók á sínum tíma. Svona lán eru kölluð „barnalán“. Einnig kom fram að líf einhentra er ekkert spaug, eða hvað? Takk elskulega frændfólk og makar, systur og mágar, fyrir samveruna, það er svo gaman að fá góða gesti. Einn þeirra gleymdi bakpoka…

Jólaboðið 2ö12

Jólaboð

Hið mikla jólaboð Binna er afstaðið en á morgun er jólaboð hjá mér með barnabörnum ömmu og afa á Akureyri. Við erum fjórtán og svo koma makar með eftir atvikum. Ég verð með jólaskinku að hætti hússins og heitt glögg en allir koma með eitthvað gott á jólaborðið. Svo eru óvænt skemmtiatriði og loks pakkaleikurinn grimmi þar sem við svífumst einskis. Þetta verður stuð!

Blakkát

blakkat-430x600Blakkát er stykki sem fjallar um áfengisbölið, sjálfsblekkinguna, bömmerinn, fíknina og flóttann, allt á góðlátlegan hátt, alveg séríslenskan og léttkaldhæðinn. Grátbroslegt leikrit þótt handritið hefði þurft að skerpa aðeins, brýna það og hvessa svo það skeri nógu mikið í hjartað því hér er alvörumál á ferð þótt verkið sé oft þrælfyndið. Leikararnir standa sig vel, Björk Jakobs er sjarmatröll og hörkuleikkona en alltof falleg og fyndin til að hægt sé að trúa því að hún sé djúpt sokkin í eymdina. Þjónarnir eru flottir, líkið leikur stórvel. Brandarnir soldið fyrirsjáanlegir og áhorfendum ekki treyst almennilega fyrir því að skilja stykkið sem er alltaf bagalegt. Myndir úr gemsanum hennar Bokku sem sýndar eru á tjaldi bæta heilmiklu við leikritið og fylla smátt og smátt í óminnið. Blakkát er býsna skemmtilegt og vel þess virði að eyða kvöldstund í Hafnarfjarðarleikhúsinu, lítil rauðvínsflaska í hléinu kostar 1000 kall.

Einar Kristján Einarsson

í dag er afmælisdagur Einars frænda/föðurbróður (1956-2001). Ég man vel eftir sposkum svipnum á honum þegar hann var að stríða okkur systrum og okkur fannst hann óþolandi. Alltaf með einhverja sérvisku, glamrandi á gítar inni í herbergi og það sem amma dekraði við hann! En þegar árin liðu og við kynntumst honum betur lærðum við fljótt að hann var bæði fyndinn og elskulegur, hlýr og frændrækinn, góður kokkur og snillingur á gítar. Hann lést úr krabbameini, langt fyrir aldur fram. Minningin lifir í huga allra sem þekktu hann.

En meðan árin þreyta hjörtu hinna

sem horfðu á eftir þér í sárum trega

þá blómgast enn, og blómgast ævinlega,

þitt bjarta vor í hugum vina þinna.

(Tómas Guðmundsson)