Bensín og olía hækka enn. Þótt ég vildi sýna ráðdeild og vera umhverfisvæn, þá losna ég ekki við bensínið úr bókhaldinu mínu. Það er í neysluvísitölunni sem einhver fann upp og er reyndar ekki miðuð við neyslu. T.d. eru það aðeins um 20% þjóðarinnar sem reykir en tóbak er samt inni í vísitölunni. Og lánin okkar hækka þegar bensín og tóbak hækkar og undanfarið er það allt að 10 sinnum á ári. Er heil brú í þessu? Á endalaust að halda áfram að fita banka og fjármagnseigendur með þessum hætti? Er ekki kominn tími á endurskoðun og hagræðingu neytendum í vil? Ég get eiginlega ekki hætt að tuða um þetta þótt ég reyni að halda haus og brosa framan í heiminn allajafna.

Mér skilst að það muni kosta  45 milljónir að þrífa gluggana á Hörpunni á ári. Ég er að spá í að bjóðast til að taka það bara að mér fyrir ca þrjátíu.

Margs er að minnast frá liðnu ári. Ferðalög um landið, útivera og stuð enda sumarið sólríkt og veturinn mildur, svalahandrið reis í Hrauntungunni og stendur enn, stórafmæli pabba og ótrúlegur bati mömmu svo eitthvað sé nefnt. Nú hefst ár kanínunnar skv. kínverskri stjörnuspeki. Ég er algjörlega kanína og þær koma greinilega með kostum og göllum:

„Keen, Wise, Fragile, Tranquil, Serene, Considerate, Fashionable, Sneaky, Obsessive…“ sjá hér.

Áramótin voru friðsæl á mínu heimili þótt tíkin Arwen væri óróleg meðan á sprengingunum stóð. Hún fékk endalaust knús og klór og risabein sem friðaði hana umtalsvert. Nýtt ár verður örugglega gott, svo segir stjörnuspá Moggans. Ferðalög eru framundan og svo eru nokkur spennandi verkefni sem mig langar að takast á við. Helstu fyrirheitin sem eru mælanleg og verða gefin upp hér eru að hreyfa mig meira og vera dugleg að skokka úti. Svo er mottóið að slíta sig úr sófanum á kvöldin og fara í heimsóknir til vina og vandamanna am.k. einu sinni í viku,. Verið viðbúin!

Ég var að baka smákökur úr Kökubók Jóa Fel og meðan ég horfði á þáttinn hans í sjónvarpinu í kvöld (aftur, hann var endursýndur) brunnu kökurnar á síðustu plötunni við. Greiniega of mikið af Jóa í einu eða svona heitt á milli okkar.

Um helgina voru bakaðar og skreyttar piparkökur í sumarbústað í Skyggnisskógi með Sossu og Hafsteini. Börnin drógu ekki af sér við skreytingarnar (Magnús, Írena og Inga, Erik náðist ekki á myndina). Veður var gott, veislumatur á borðum og heiti potturinn yndislegur. Góð afslöppun frá vinnu og jólastressi.

Í gær var aðventugeimið. Það var rosa gaman, dýrindis veitingar og frábær skemmtiatriði. Best var samveran í góðra vina hópi og við erum líka öll rosalega skemmtileg og fyndin. Þór, Silja, Hildigunnur og Þórdís sungu nokkur jólalög fjórraddað við mikinn fögnuð og farið var í svaðalegan pakkaleik þar sem engin miskunn var sýnd, síðan í orðaleik sem reyndi á leiklistarhæfileika, útsjónarsemi og orðsnilld. Með þessu öllu var sötrað jólaglögg og fleira, spjallað og spekulerað. Stuð og stemning sem kemur manni aldeilis í jólaskap.

Laugardaginn 4. des. kl. 20 á ég von á ættingjum mínum í  heimsókn. Barnabörn afa og ömmu á Akureyri eru 14 og flest búa hér á höfuðborgarsvæðinu. Ég er elst og rennur blóðið tiil skyldunnar að hafa partí enda er hér um að ræða einstaklega fallegt og skemmtilegt fólk. Þeir sem vettlingi geta valdið ætla að líta inn í jólaglögg og gæða sér á skinku og kannski paté líka og svo kemur hver og einn með sitt bús og eitthvað gúmmulaði á borðið eftir efnum og ástæðum. Ég hlakka til að sjá ykkur, elskurnar!

Inga fékk nýtt rúm á föstudaginn þar sem hún er vaxin upp úr því sem keypt var 2004. Ikearúmið er til sölu, sest afar ódýrt.