Rússkí

Brátt held ég á slóðir Dostojevskís í Pétursborg. Hef verið að lesa mér til í ferðabókum (Lonely Planet) og þar kennir ýmissa grasa. Ef maður er þar á ferli að vetri til þarf að passa sig sérlega vel á grýlukertum sem hanga fram af þakskeggjum. Snemma á vorin er mikið um moskítóflugur og þær eru bæði ágengar og stórvaxnar. Síðla hausts, áður en kveikt er á kyndingunni, skríða flær upp milli gólfborðanna í leit að yl og viðbiti. Ekki er ráðlegt að taka ómerktan leígubíl og alls ekki fara upp í bíl þar sem annar farþegi er fyrir. Og alltaf á að vera á verði gagnvart vasaþjófum sem eru alls staðar. Þrátt fyrir ógnir Pétursborgar hyggst ég slíta mig úr hópnum um stund og heimsækja Dostojevskí-safnið, vopnuð skordýraeitri, regnhlíf með eitruðu oddi og með öryggishjálm.

Móskarðshnjúkar

Í dag gengum við á Móskarðshnjúka (667 mys) í sólskininu, vestari tindana. Það var ansi hvasst eftir því sem ofar dró. Útsýnið var stórkostlegt. Þetta er skemmtileg leið og við vorum um 4 tíma að klöngrast þetta. Brynjar var með allar græjur, flottan bakboka, orkugel, aukaföt og vatnskút með slöngu. Í pokanum var m.a. dúnvesti sem kom í góðar þarfir því vindurinn uppi var ískaldur.

„Úttekt“ á framhaldsskólum

Ég er búin að skoða svokallaða „úttekt“ á framhaldsskólum sem tímaritið Frjáls verslun hefur búið til eða látið búa til og auglýsir grimmt þessa dagana. Hún er óttalegt bull frá byrjun til enda og gefur bæði einhæfa, villandi og takmarkaða sýn á íslenska framhaldsskóla. Segir það eitthvað stórkostlegt um skóla og skólastarf að hafa unnið þýskuþraut, söngkeppni, Morfís eða Gettu betur? Eða hvað margir umsækjendur eru um hvert pláss? Það væri beinlínis óeðlilegt ef MR sem er efstur skv. stigagjöf í „úttektinni“ kæmi ekki „best“ út, m.v. hvað mörg prik eru gefin fyrir að vinna í keppni, fyrir utan að í þeim skóla eru frekar fáir nemendur teknir inn, valdir eftir einkunnum, inn á tvær stúdentsbrautir? Hvaða tíðindi eru það að bestu bóknámsnemendurnir standi sig best? Ekki viljum við að allir framhaldsskólar séu eins og MR, með fullri virðingu fyrir honum? Breyturnar í „úttektinni“ gefa einfaldar, flatar og fyrirfram ákveðnar niðurstöður. Ég vona að fólk kynni sér þetta vel, kokgleypi ekki vitleysuna eða tyggi hana upp úr Frjálri verslun.

Tíu bestu

Í morgun voru „tíu bestu framhaldsskólarnir“ listaðir upp í Fréttablaðinu eftir því hversu vel þeir standa sig í Morfís, Gettu betur, eðlisfræðikeppni, frammistöðu í íþróttum og menntun kennaranna. Í sjónvarpinu í kvöld var spjallað við fólk á elliheimili. Í ljós kom að margir þjást af þunglyndi og að aðbúnaður er mjög misjafn.  Mér þætti gaman að sjá lista yfir 10 bestu elliheimilin á landinu í blaðinu á morgun.

Vorsól

Gönguferð með Arwen er alltaf ljúf. Þessi mynd var tekin um daginn í kvöldvorsólinni í Garðabæjarhrauni. Frúin er í nýrri flíspeysu. Hlaupatúr er líka vel þeginn hjá Arwen, ekki síst ef hún fær að vera laus og getur skottast í kringum okkur. Hún var lúin í gær eftir 7,5 km í kringum Helgafell á góðum spretti.

Maður í myrkri

Maður í myrkri eftir Paul Auster var á náttborðinu síðustu daga. Ekki var gagnrýnandi NY Times hrifinn. En ég er stórhrifin að því undanskildu að þýðingin er því miður óttalegt klambur en við því getur Paul Auster lítið gert. Alltof víða eru illa þýddir frasar,  mikið af lausum greini (hin, hinn) og þýðingabragur (af ensku) á setningum.  Af því að ég var enn í stuði eftir að hafa setið í hinni frábæru þýðingarnefnd 2010 hripaði ég hjá mér nokkur dæmi um það sem betur mætti fara og birti hér örfá þeirra:

„Í morgunsár næsta dags vaknar hann… (12). Þegar hann kastar skilnaðarkveðju á Brick… (18). Ég tek mér stundarhlé til að skipta um stöðu í rúminu… (29). …sem ýtir á undan sér innkaupakerru fylltri eigum sínum… (30). …sundursprengt átakasvæði hrannað rústum og líkömum andvana borgara… (32). Ég er að hlusta vinur. Ég er ekkert nema eyrað (37). Áður en hún hleypir sjálfri sér út… (45).“

Svo má spyrja, hvernig pissar maður í gat á flösku? (sbr. bls. 50).

Esjan

Akranes í baksýn

Mætt við Esjurætur kl. 9 í morgun, kraftganga upp á topp (914 m.y.s.) og svo skokkað í sólbráðnu hjarni áleiðis að Hábungu. Yndislegt veður. Svo var hlaupið niður, bara harkan sex. Arwen var ekkert sérlega lipur í klettunum en lét sig hafa það.

Á toppnum