Þessi er komin á náttborðið. Meira síðar.
Freddie Mercury í Hörpu
Freddie Mercury (1946-1991), drottningin í Queen, var einn allra besti rokksöngvari 20. aldar, hann var öflugur laga- og textahöfundur og hafði rödd sem spannaði fjórar áttundir. Fjörug sviðsframkoma, há kinnbein, skakkar tennur, ber bringa og þröngar sokkabuxur tryllltu lýðinn í þau 20 ár sem hann var í sviðsljósinu.Í gær voru tónleikar til heiðurs honum í Hörpu. Fimm karlar (Hulda Björk Garðarsdóttir söng eitt lag) tóku Queen- lögin með flottri hljómsveit og bakröddum, það voru þeir Eiríkur Hauksson, Eyþór Ingi, Friðrik Ómar, Magni og Matthías Matthíasson. Tónleikarnir fóru rólega af stað, nokkrar syrpur voru teknar og svo skiptust söngvararnir á að flytja uppáhaldslögin sín. Síðasta lag fyrir hlé var Bohemian Rhapsody í mjög vel heppnaðri útsetningu. Ég er ánægð með tónleikana þótt salurinn væri daufur og þvingaður, Eldborg býður ekki upp á mikið stuð, allir eru í fínu fötunum og sitja eins og dúkkur í dýru sætunum sínum. Ekki fannst mér Friðrik alveg nógu góður í uppáhaldslagin mínu, Somebody to love, en hann bræddi mig samt þegar hann snaraðist að trommusettinu í lokin og spurði út í sal: Hélduði að hommar gætu ekki spilað á trommur? Eyþór Ingi var langmesti stuðboltinn, röddin alveg frábær og það geislaði af honum sönggleði og ástríða fyrir flottri rokktónlist. Magni er góður líka með kröftuga rödd og töffaralega sviðsframkomu en hann rífur alltaf míkrófóninn frá andlitinu svo lokatónar hverrar hendingar verða endasleppir. Hjálagt er heiðursvídeo sem gert var um Mercury í tilefni af 65 ára ártíð hans í fyrra. Hann veitti ekki mörg viðtöl um ævina og forðast fjölmiðla en var hundeltur af gulu pressunni, ekki síst síðustu æviárin vegna þráláts orðróms um heilsubrest vegna alnæmis sem varð svo hans banamein.
Vetrartískan
Það er alltaf gaman að fá sér ný föt og poppa fataskápinn aðeins upp. Ég keypti mér þennan fína sparijakka (Zara), samkvæmiskjól og kimono (Topshop) á ágætu verði og er nú tilbúin í fjörið. Bæði kjóll og jakki eru í djörfum litum en kimonoinn í gamla, góða og örugga svarta litnum sem ég dett alltaf í en þarf endilega að hvíla mig á. Ég var með tískulöggu með mér sem gaf góð ráð og hlífði mér hvergi þegar kom að smekk og mátun. Hún vélaði mig til að splæsa á sig gaddaskónum sem sjá má á myndinni.
1Q84
Nýjasta bók Murakami, 1Q84, er tæplega 1000 bls doðrantur og ég rogaðist með hana út um allt í sumarfríinu því ég gat ekki hætt að lesa. Sagan gerist á hinu sögufræga ári 1984 og er flókin og margslungin en í stuttu máli skipta aðalpersónurnar tvær Aomame, einkaþjálfari og leigumorðingi, og Tengo, sem er leigupenni og stærðfræðikennari, sögunni á milli sín og svo birtast mergjaðar aukapersónur sem dregnar eru skýrum dráttum. Milli Aomame og Tengo liggja þræðir og þau dragast hvort að öðru þótt þau hafi aðeins kynnst lítillega þegar þau voru 10 ára og búi hvort í sínum borgarhluta. Fantasía í heimi lítillar bókar eftir 17 ára stúlku tekur yfir raunveruleikann, tunglin eru tvö á himni, furðuverur á sveimi og lífshætta vofir yfir. Bókin skiptist í 3 hluta sem hafa afar rólegt yfirbragð eins og höfundar er siður og en sá síðasti er langhægastur og reynir verulega á þolrifin. Fengist er við ástina og bókmenntirnar, kynlíf, ofbeld, barnaníð og dauða, sjálf og raunveruleika, bernsku og uppvöxt, einveru, trúna og tilganginn, auk þess sem maður sogast inn í japanska menningu; misosúpu og te, heiður, kurteisi og yfirvegun. Stíl Murakami er heillandi (á ensku), hugsanir persóna eru skáletraðar en oftast lýsir hann á sinn einfalda, ljóðræna og hlutlausa hátt. Kynlíf skipar stóran sess í bókinni,þar eru skyndikynni, framhjáhald, yfirnáttúrulegt kynlíf, ofbeldiskynlíf og Murakami er sérlega upptekinn af brjóstastærð og síðu hári þegar hann lýsir kvenfólki. Draumar og minningar koma mikið við sögu, og tónlist, aðallega jazz og sígild tónlist, ekki síst þessi stutta sinfónía. Þetta er segulmögnuð bók á sinn sérstaka hátt.
Gamla settið
Spil með handunnum myndum Katrínar Björgvinsdóttur. Myndirnar, sem eru um 2 m á hæð í frumgerðinni, eru af Katrínu og eiginmanni hennar og eru tileinkaðar þeim Íslendingum sem með iðjusemi hafa byggt þetta land.
Sumarmynd
Landakot
Faðir minn dvelur nú á Landakotsspítala sér til hressingar og heilsubótar. Þar er starfsfólkið afar alúðlegt og umhverfið notalegt og mikið lagt upp úr að fólki líði vel. Hann er í góðu herbergi með útsýni yfir vesturbæinn.
Reykjavíkurmaraþon
Reykjavíkurmaraþonið, 10 km, er mjög skemmtilegt hlaup og á heimsmælikvarða. Að hlaupi loknu spjallaði ég við franska konu sem kom hingað um langan veg gagngert til að taka sjálf þátt í 10 km og fara svo með börnin sín í Latabæjarhlaup. Hún hrósaði þessu öllu í hástert. Í hlaupinu ríkti almenn gleði og bros á flestum andlitum. Hlaupið er mjög vel skipulagt, hvatningin frábær og hlaupaleiðin skemmtileg. Undirbúningur minn vikuna fyrir fólst aðallega í að skokka í 60 mínútur á þriðjudeginum, fara rólega 4 km á fimmtudaginn, skólpa úr hlaupagallanum, klippa táneglurnar og nudda fætur með góðu kremi, sofa vel og hvílast og borða létt og hollt dagana fyrir hlaupið. Ég bægði markvisst frá mér stressi, leti, úrtölum og niðurrifshugsunum sem leituðu á. Um morguninn vaknaði ég snemma, borðaði minn hafragraut með eplum og hörfræolíu eins og venjulega en sleppti sveskjunum og sötraði powerrade með. Tók svo eina rippedfuel töflu og var til í slaginn. Tilfinningin að hlaupi loknu var góð, ég hafði reynt almennilega á mig, var ómeidd og endurnærð og afar stolt af sjálfri mér að hafa náð takmarkinu sem ég setti mér. Ég mæti aftur á næsta ári með nýtt markmið.
10 km RM 2012
Skemmtilegt hlaup, frábært veður og stemning. Var með blóðbragð í munni eftir endasprettinn sem var rosalegur og Odda tók á móti mér í markinu og spurði hvort ég þyrfti að gubba… Ég stefndi á að vera undir 60 mín og náði því. Úrslit:
Tíminn er:
168 59:06 7119 Steinunn Inga Óttarsdóttir
Playlistinn fyrir RM2012
This is love – Will.i.am
September – Earth Wind and Fire
Domino – Jessie J
I´m alive club remix – Celine Dion, Blondie
Where have you been – Rihanna
Release me – Agnes
Tried yah luv – Third World
We found love – Rihanna
Please dont go – Mike Posner
Qween – Retro Stefson
No superstar – Remedy P&R
Please dont go – Hermes House Band
Niggaz in Paris – Jay-Z, Kayne West
Vouge – Madonna
Addiction – Medina
